KISAH siPALUi:MANGGUYANG PAGAR

KISAH siPALUi

MANGGUYANG PAGAR

WAYAHINI tiknulugi sudah liwar majunya. Manusia sudah pintar-pintar baulah parangkat tiknulugi. Sampai-sampai haraga hinpun haja bamumurahan. Amun 10 tahun lalu liwar larangnya, wayahini ada haja nang Rp 100 ribu sabuting.

Jangan hiran amun wayahini bubuhan tukang ujik, tukang bica, atawa tukang sayur kada ngalih-ngalih kaya bahari lagi. Nang handak mamasan uji, bica, atawa mamasan tarung wan waluh gasan baulah gangan tinggal talipun haja.

Tamasuk bubuhan Palui sapakawanan nang kada mau katinggalan, baisian hinpun jua. Malah nang kaya Garbus haja amunnya bajalan bisa sampai talu buting mambawa hinpun. Gasan nangapa-ngapakah manalu butingan hinpun.

"Nang sabuting gasan gawian, nang sabuting ngini gasan urang di rumah... Nah, nang sabutingnya ngini nang pina kuruk ni gasan batalipunan wan kakawanan nang kaya buhan ikam ni pang Lui ai," ujar Garbus kada mau kalah.

Mandangar pandiran Garbus tu, Palui pada bakulibi ha. "Cakah ikam tu Bus ai. Sabubuting gin sama haja kalu kada tapaimbay jua amun manalipun," ujar Palui manyahuti.

Kamarian tu Palui wan Garbus bajalan manuju ka rumah Tulamak. Napa ditalipun-talipun kada manyambung tarus, buhannya gair kalu pina kanapa-napa di Tulamak.

"Ham, daripada kaya si Tulamak tu nah Lui, baisi sabutingannya. Rahat dihubungi kada kawa sama sakali. Amun dua atau talu buting kawa kalu. Sabuting kada kawa, numur sabutingnya," ujar Garbus masih mambila diri.

Sambil bapandiran, kada karasaan nang badua bakawal tu sampai ka parak rumah Tulamak. Tulamak nang dipandirakan badirian ha di muka rumahnya. Kada sing bajuan sambil mamingkuti hinpun. Sakali sakali inya mangguyang pagar sambil manjanaki hinpun.

"Kenapa Mak? Rusak kah hinpun mu jadi ngalih banar dihubungi," ujar Palui marawa Tulamak. Nang dipandiri baunggut haja. Matanya kada kalain, ka hinpun haja.

"Cubai talipun kustumer sarvisnya di hinpun tu Mak ai. Kawanku sumalam kaya itu jua," papadah Garbus.

"Iya am nah. Sudah bapuluh-puluh kali aku manalipun kustumer sarvisnya, tatap kada mau jua. Rahat kutalipun tadi ada suara babinian nang manyuruh aku picik pagar. Makanya am aku di muka pagar haja. Kadanya kupicik lagi, kuguyang sudah pagarnya tatap kada mau," ujar Tulamak.

Mandangar jawaban Tulamak mangalangkang Palui wan Garbus manawaakan kawannya nang pina sadang pintarnya ngitu.

"Nah manawaakan! Amun kada parcaya talipun saurang nah, dangarakan saurang inya manyuruh mamicik pagar," ujar Tulamak sarik.

"Hahaha, bujur haja babinian di talipun tu Mak ai. Ikam nang kada tapi pintar. Biar sampai rabah pagarnya tatap kada mau. Lain pagarnya nang dimaksud babinian di hinpun tu. Tapi gambar pagar di hinpun nang dipicik," ujar Garbus.

"Hiih, baik ikam kada sampai tuntung mandangarakan babinian di hinpun bapandir. Amun sampai tuntung iya ujar inya picik bintang pulang. Lucut am ikam mamikirakan mamicik bintang," ujar Palui.

"Bujur ikam Lui ai. Ada jua babiniannya tu manyuruh mamicik bintang tadi, kaya apa yu?" ujar Tulamak.

"Tahu ah. Babarang ikam ha. Kami nang waras ni bakalah haja," ujar Garbus sarik.

Tweet

Postingan terkait:

Ditulis Dani — Kamis, 10 Maret 2016 — Add Comment