KISAH siPALUi
DITANGKAP HANSIP
SALAWAS manjabat katua RT macam-macam banar kasibukan Palui.
Kada tahu hari parai atawa ahad Palui kalu ada kagiatan atawa dikiyau pambakal
tapaksa inya turun.
“Ikam datang dimana Lui, hari ini hari Ahad kanapa maka pina
bakapitan map” ujar Garbus.
“Aku mahadiri rapat di balai desa, pambakal manarangakan
alasan pamarintah mangganti minyak gas lawan gas” ujar Palui.
“Kalu sual mangganti itu tasarah pamarintah haja karna
pamarintahlah nang bakuasa. Kita kada kawa malawan, bubuhan nang bademo haja
dianggapnya angin lalu” ujar Garbus.
“Maka wayahini jamannya demukrasi” ujar Tuhirang.
“Demukrasi itu andaknya dimuntung” ujar Palui.
“Lalu napa kisah lain lagi nang manarik dirapat itu Lui ?”
ujar Garbus.
“Aku nang hiran wan kasihan banar adalah nasib pambakal”
ujar Palui.
“Kanapa pambakal Lui ?” ujar Tulamak umpat batakun.
“Pambakal imbah tuntung bapidatu ditangkap hasip” ujar
Palui.
“Mungkin hansip tahu bahwa pambakal itu tamasuk KKN lalu
ditangkapnya” ujar Garbus.
“Kira-kira napa masalahnya Lui maka sampai ditangkap hansip”
ujar Tulamak.
“Sabujurnya kada gawian hansip manangkap urang apalagi
manangkap pambakal atasannya” ujar Palui.
“Kalu kadada salah, musti hansip kada manangkapnya, jadi
musti ada apa-apanya” ujar Tuhirang.
“Kaya apa cara manangkapnya Lui?” ujar Garbus.
“Imbah tuntung bapidatu dipudium, malipat kartas pidatu lalu
bapaling handak turun........ langsung ditangkap hansip, kasihan banar” ujar
Palui.
“Langsung diborgollah tangan sidin ?” ujar Tulamak.
“Kada diborgol, malah langsung digandeng. Maklumlah.....
Pambakal kita ini sudah tuha, rupanya karna kalawasan badiri bapidatu lalu pina
mauk handak rabah wayah itulah hansip manangkap sidin” ujar Palui bakisah.
“Oooooo...... Palui, Palui dasar panderan ikam mangabuau.
Kukira tadi pambakal ditangkap karna handak dibawakakantur pulisi, sakalinya
karna sidin mauk, junjang lalu ditangkap dan ditulung ulih hansip karna sidin
handak rabah” ujar Garbus kakalahan.
Belum ada tanggapan untuk "KISAH siPALUi"DITANGKAP HANSIP"
Posting Komentar