KISAH siPALUi:BAPAKAIAN

KISAH siPALUi

BAPAKAIAN

TAKAJUTAN bubuhan Palui limbah mandangar julak Ijul kawin pulang. Padahal bini nang ada sudah dua ikungan. Apalagi julak Ijul sudah baumur satangah abad labih. Rami urang kampung mamanderakan sidin tamasuk bubuhannya Palui.

“Kita kalah lawan sidin, kita hanyar saikung, sidin sudah talu ikung,” ujar Tulamak pina gagarunum wayah mamanderakan Julak Ijul.

“Manurut aku julak ijul tu pasti bapakaian harat banar jadi kawa babini talu,” ujar Palui mamadahi

“aku curiga jua lui ai,tapi manurut pakayianku bahari, amun urangbapakaian atawa bailmu bibinian hidupnya pastilah sial,” ujar tulamak

“Sial kaya apa Mak?” ujar Garbus manakuni

“Pancarian kada manatap, Muha kadap karna bailmu nang manyalah,” ujar Tulamak.

“Tapi kulihat julak Ijul itu sugih haja, pancarian sidin tatap haja badagang minyak,” ujar Garbus asa kada pacaya.

“Tapi manurut aku pakaian sidin dasar harat, tabukti sidin kawa babini tiga,’ ujar Palui.

“Aku kada pacaya Lui ai, sidin tamasuk urang nang tahu di agama pulang. Kada mungkin sidin bailmu atawa bapakaian mun cuma urusan bibini,” ujar Garbus mangarasi.

“Ba-arti mata ikam rabun alias kada hawas, amun urang hawas banar pasti malihat sidin itu bapakaian,” ujar Palui mangijipi Tulamak.

Malihat Palui mangijipi, langsung Tulamak mamikirakan napa maksud panderan Palui.

“Bujur ujar Palui Bus ai, sidin itu harat banar pakaiannya,” ujar Tulamak maakuri Palui.

“Kanapa ikam umpat jua mamadahakan kaya itu Mak? Kalu kada bujur kaina lalu tarjadi fitnah, dan fitnah itu tamasuk dusa basar,” ujar Garbus manumpalak Tulamak.

“kami kada mamfitnah Bus ai, nang kami panderakan ini badasarkan bukti. Amun julak ijul kada bapakaian alias kada babaju, artinya batilanjang sidin, mana ada babinian nang hakun diambil bini urang batilanjang,” ujar Tulamak mamacah pandiran.

“makanya pakaian sidin harat kalu,? Ngarannya sidin urang sugih,” ujar Palui jua tatawa malihat garbus kakalahan.

Tweet

Postingan terkait:

Ditulis Dani — Rabu, 20 Januari 2016 — Add Comment