KISAH siPALUi:BADAGANG HP

KISAH siPALUi

HILANG pulang Palui, sudah batangah bulan ini inya kada saling cangulan bakakawanan. Makanya kakawalannya baistilah mailangi ka rumah Palui.

“Uiii ... bini Palui, mana abahnya?” ujar Garbus.

“Ayu masukan, lawas kita kada batamuan,” sahut bini Palui.

“Karna lawas kada batamuan itulah maka kami mailangi. Mana abahnya?” ujar Tulamak.

 “Sudah batangah bulan ini jua abahnya badadagangan,” ujar bini Palui.

“Badadagangankah atawa badagang?” ujar Garbus.

“Kalu badadagangan artinya bamainan atawa incaan haja kada bujuran, tapi kalu badagang ba arti bamudal karna ada nang dijual,” ujar Tulamak mahimati.

“Kusambat badadagangan karna mudalnya halus dan nang dijual kada banyak,” ujar bini Palui.
“Bajual napa laki ikam itu?” ujar Garbus.
“Wayahini lakiku babisnis HP,” ujar bini Palui.
“Kalu babisnis HP kada sadikit mudal. HP itu tamasuk barang moderen dan larang banar haraganya karna kawa mangganti talipon,” ujar Tulamak tapikir dalam hati.
“Nahhh ... itu abahnya datang,” ujar bini Palui manunjuk lakinya.
“Kami himung banar mandangar ikam sudah ada gawian badadagangan,” ujar Tulamak.
“Bajualan saraba sadikit dimudali mamarina,” ujar Palui.
“Syukur banar ikam baisian mamarina urang baduit jadi kawa mamukui gasan mudal,” ujar Garbus.
“Bujurankah ikam bajualan HP?” ujar Tulamak.
 “Hi’ih, saraba sadikit dan sudah mulai banyak langganannya,” ujar Palui.
“Hari ini barapa bigi payunya?” ujar bini Palui.
“Hari ini kurang labih 300 bigi payunya,” sahut Palui.
“Masya Allah, cagar sugih banar ikam Lui ai kalu sampai bajual 300 bigi saharinya karna haraganya larang banar,” ujar Tulamak takajut.
“Malihat pang sabuting cuntuhnya, kalu kaina kawa mangaridit,” ujar Garbus.
“Jangankan sabuting, sapuluh buting pun ikam kubari haja,” ujar Palui sambil mangiyau bininya minta bawakan HP.
“Ini nah, HP-nya,” ujar bini Palui manjulung bungkusan.
“Bungkusan napa ini Lui,” ujar Tulamak.
“Inilah bungkusan HPnya. HP ini lain gasan talipon Mak ai tapi gasan dinyanyam. HP nang kami maksud adalah singkatan hintalu puyuh alias hintalu burung puyuh,” ujar Palui mangalakak tatawa mangalahakan Garbus wan Tulamak.

Tweet

Postingan terkait:

Ditulis Dani — Sabtu, 16 Januari 2016 — Add Comment