KISAH siPALUi:WARISAN

KISAH siPALUi

WARISAN

ABAH Palui tamasuk tuha banar, sudah kada kawa bagawian lagi. Nang ngaran sudah tuha parak uzur, maka abahnya Palui mangumpulakan anak anaknya handak bamufakat kaya apa kalu inya kada baumur lagi. Aku handak baamanat lawan bubuhan ikam. Aku ini sudah tuha, tinggal mahadang diambili urang haja lagi, ujar abahnya.

Ini jangan dianggap wasiat, tapi gasan kita maklumi haja, ujar sidin pulang. Sambil manunjuk kasubalah kanan: Tanah kabun di kanan rumah ini luas puluhan burungan, di balakang situ pahumaan ratusan burungan, kaya itu juga di subalah kiwa puhun rumbia, kabun paring, puhun mangga, durian sampai ka watas urang itu luasnya dua tiga puluh burungan, ujar abahnya.

Tanganga Palui lawan dan sanak-dangsanaknya mandangarakan kasugihan abahnya, sambil baharap mudahan sidin babagi warisan. Imbah manyambati tanah kabun pahumaan itu, abah-5nya tatunduk saling lawasan lalu kadangaran sidin taisak-isak, menangis sambil mamacul kaca mata mambarasihi banyu mata. Malihat abahnya tatangis, Palui lawan dangsanaknyadangsanaknya taumpat sadih lalu ada jua nang umpat manangis.

Aku kada sampai hati manyambat, kada purun lawan anak buah, kasihan bubuhan ikam,ujar abahnya pulang. Sambat ja bah-ai, kami ihlas haja, maharagu saling mambantu hasilnya atawa bisa jua pian bagi rata, atawa dibagi sasuai hukum waris, ujar Palui sambil nang lainnya katuju haja.

Kaya ini anak-anakku sabaratan, dangarakan amun ikam ihlas. Kabun nang di subalah kanan rumah kita ini sudah tasanda puluhan tahun kada kawa manabusi, pahumaan luas di balakang rumah itu ampunya Haji Syukri kita hanya maambil upah haja. Kabun buah di kiwa kita ini sudah tamadak di bank kada kawa mambayar cicilan parak disita urang, sambil manyambat itu abahnya Palui manangis makin banyaring. Wasiatku, barukun-rukunlah ikam mamunahinya, aku kada kawa mambari warisan apa-apa, aku banar bubuhan ikam akur mawarisi hutanghutangku, ujar abahnya.

Palui lawan dangsanak dangsanaknya taungut kada kawa sing bunyian lagi, jangankan mamunahi hutang, gasan hidup hari-hari haja sudah lucut.

Tweet

Postingan terkait:

Ditulis Dani — Kamis, 10 Maret 2016 — Add Comment