KISAH siPALUi:TASALAH CETAK

KISAH siPALUi

TASALAH CETAK

Imbah malalui parjuangan panjang ahirnya kawa jua Palui mangawini si Zaleha anaknya wak Haji Duraup. Kada sia-sia talu tahun bapacaran, maskipun kada gampang mandapatakan si Zaleha karna salain mintuha nang kada katuju wan jua banyaknya pasaing nang handak mandapatakan si Zaleha.

Mulanya mintuhanya kada satuju lawan si Palui karna Palui kada sing gawian. Tapi karna Palui sudah cinta mati lawan si Zaleha akhirnya Palui cangkal bausaha. Wayah ini Palui nyaman sudah baisian usaha saurangan di pasar. Marasa sudah siap lahir wan bathin Palui ahirnya malamar si Zaleha. Karna malihat Palui pina nyaman kada nang kaya dahulu lagi, wak Haji Duraup hakun manarima si Palui manjadi manantu sidin. Tanggal parkawinannya gin sudah disapakati bulan kaina.

"Ulun asa was-was hati kaka ai, sabulan lagi kita kawin ulun takutan kalo acaranya kada bajalan lancar," ujar Zaleha mamanderi Palui.

"Ikam tanang haja ding ai, insyaallah kada bakal tarjadi napa-napa pang, kita bado'a haja supaya acaranya lancar haja," ujar Palui manyahuti.

"Masalah undangan pang kaya apa, sudah lah pian ulahakan?" ujar Zaleha batakun.

"Kalo masalah undangan isuk sudah tuntung, aku tadi sudah manakuni lawan nang tukang cetak," ujar Palui.

Isuknya Palui minta gani-i lawan Garbus maambil undangan di rumahnya julak Sungar. Palui takutan maambil saurangan karna julak Sungar takanal panyarikan kada kawa tasalah sadikit.

Bulik maambil undangan Palui singgah satumat ka rumah Zaleha, imbah itu hanyar bulik ka rumah.

Hanyar sampai di rumah balum sawat baduduk lagi, datang Garbus bukah-bukah ka rumah Palui.

"Lui...Itu nah si Zaleha manggaraung manangis, lajui datangi ka rumahnya," ujar Garbus manggah imbah bukah-bukah kaunyuhan.

"Kanapa inya bus, basual lawan abahnya kah?" uajr Palui handak tahu.

"Kada tahu jua kanapa, imbah ikam bulik maantar undangan tadi timbul inya mahamuk wan manangis nyaring banar, lajui datangi sana," ujar Garbus sambil manarik tangan Palui.

Kada lawas sampai Palui di rumah si Zaleha, pina galu urang di rumah Zaleha.

"Uii...ding kanapa ikam mahamuk wan manangis kaya ini?" ujar Palui batakun.

"Ulun kadi jadi kawin lawan pian, pian tega banar lawan ulun, dianggap apa garang ulun nih jadi pian tega banar kaya itu lawan ulun?" ujar Zaleha sambil manangis basasigan.

"Hau...salah napa garang aku ding jadi ikam manuduh aku tega banar lawan ikam?" ujar Palui bingung.

"Cuba pian baca undangan nang pian ulah ngitu, kanapa isinya nangkaya itu? ujar Zaleha.

"Astagfirullah....aku pang handak bahancap-hancap samalam, lalu aku tasalah tulis. Rupanya nang tukang cetak tahu maumpati haja cuntuh undangan nang aku tulis di kartas samalam itu ding ai," ujar Palui manjalaskan.

"Pantas ai si Zaleha hamuk kada jadi kawin, undangannya sakalinya tasalah cetak. nang saharusnya ditulis ‘Turut Mangundang saluruh kaluarga’ Palui tatulis ‘Turut Manunggang Saluruh Kaluarga’. Dasar Palui kada tapi pintar," ujar Garbus bajauh sambil takurihing.

Tweet

Postingan terkait:

Ditulis Dani — Kamis, 10 Maret 2016 — Add Comment